च्याम्पियन्स लिग फुटबलमा बार्सिलोनाले एफसी पोर्टोलाई हराएको छ । बुधबार समूह एचको खलमा बार्सिलोनाले पोर्टोमाथि १–० को जित जित निकालेको हो ।
पहिलो हाफको इन्जुरी समयमा बार्सिलोनाका लागि फेरान टोरेसले गोल गरेका थिए । सोही गोल बार्सिलोनालाई तीन अंक दिलाउन पर्याप्त रह्यो ।
बार्सिलोनाले यस सिजन च्याम्पियन्स लिगका दुवै खेलमा जित निकालेको छ । रोबर्ट लेवान्डोस्कीको स्थानमा मैदान छिरेका म्यानचेस्टर सिटीका पूर्व खेलाडीले बार्सिलोनाका लागि गोल गरेका हुन् ।
खेलको अन्तिम समयमा गाभी रातो कार्ड खादै मैदान बाहिरीएपछि बार्सिलोना १० खेलाडीमा सिमित बनेको थियो ।
बार्सिलोनाका युवा स्टार लामिनी यामलले आफ्नो प्रभावलाई कायमै राखेका छन् । उनी १६ वर्ष ८३ दिनको उमेरमा सुरुआती लाइन अपमा रहेर च्याम्पियन्स लिग खेल्ने सबैभन्दा कम उमेरका खेलाडी बनेका छन् ।
समूह एचमा बार्सिलोनाले २ खेलमा ६ अंक सहित शीर्ष स्थानमा छ । पोर्टो ३ अंक सहित दोस्रो स्थानमा छ । अर्को खेलमा शख्तर डोनेस्कले बेल्जियमको रोयल एन्टवर्पमाथि ३–२ को जित निकालेको छ र अंक तालिकामा तीन अंक जोडेको छ ।
