नेपालगन्ज — बाँके क्षेत्र नं. २ का प्रतिनिधि सभा सदस्य पदका उम्मेदवार दिपेन्द्र बिष्ट यतिबेला नेपालगन्ज–१३ र २१ तिलियानपुरमा घरदैलो कार्यक्रमलाई तीव्रता दिइरहनुभएको छ। टोल–टोलमा पुगेर मतदातासँग भलाकुसारी गर्दै उहाँले स्थानीयको समस्या सुन्नुका साथै आफ्नो प्रतिबद्धता प्रस्तुत गर्नुभएको छ।
घरको आँगनमै बसेर भएको संवादमा वडा बासीको हार्दिक स्वागतले बिष्ट प्रफुल्ल देखिनुहुन्थ्यो। कतै फूलमाला, कतै खादा, कतै साधारण हातेमालो—तर सबै ठाउँमा देखिएको आत्मीयताले चुनावी अभियानलाई भावनात्मक बनाएको थियो।
अभियानमा नेपाली कम्युनिस्ट पार्टीका लुम्बिनी प्रदेश सचिवालय सदस्य डिल्ली बराल (अमिर) लगायत प्रदेश, जिल्ला र स्थानीय तहका नेताहरूको सहभागिता रहेको थियो। संयुक्त उपस्थितिले संगठनात्मक एकता र प्रतिबद्धताको सन्देश दिएको सहभागीहरू बताउँछन्।
घरदैलो क्रममा बिष्टले स्पष्ट शब्दमा वाचा गर्नुभयो, “म यस वडाका वडा बासीको दुख–सुखको सारथी बन्न चाहान्छु।” उहाँले थप्नुभयो, “तपाईंहरूको साथ र विश्वासलाई कहिल्यै धोका दिने छैनु।”
स्थानीयले पनि आफ्ना अपेक्षा खुलस्त राखेका थिए—सडक सुधार, खानेपानी, युवाका लागि रोजगारी, महिला सशक्तीकरण र सामाजिक सुरक्षाजस्ता विषयमा छलफल भयो। बिष्टले ती विषयलाई प्राथमिकतामा राख्ने प्रतिबद्धता जनाउनुभयो।
तिलियानपुरको आजको घरदैलो अभियानले चुनावी प्रतिस्पर्धालाई मात्र होइन, सम्बन्धको गहिराइलाई पनि उजागर गरेको छ। आत्मीयता, विश्वास र साथको यो वातावरण अब मतपेटिकामा कस्तो परिणाम दिन्छ, त्यो समयले बताउनेछ। तर आजका लागि भने तिलियानपुरले स्पष्ट सन्देश दिएको छ—जनता सुन्ने र साथ दिने नेतृत्व खोजिरहेका छन्।
