नेपालगन्ज । बिहानको शीतल हावासँगै नेपालगन्ज–१४ का टोलहरूमा चुनावी चहलपहल बढेको देखियो। बुधबार बाँके क्षेत्र नं. २ का प्रतिनिधि सभा सदस्य पदका उम्मेदवार दिपेन्द्र बिष्ट बिहानै घरदैलो अभियानमा सक्रिय रहनुभयो।
घर–घरमा पुगेर उहाँले मतदातासँग आत्मीय संवाद गर्नुभयो। वृद्धवृद्धा, महिला र युवासँग बसेर स्थानीय समस्या सुन्नुका साथै मतदान कसरी गर्ने भन्ने व्यावहारिक जानकारी दिनुभयो। मतपत्रमा सही चिन्ह लगाउने तरिका सम्झाउँदै उहाँले भन्नुभयो, “सही मत नै सशक्त आवाज हो।”
उहाँले आफ्नो प्रमुख एजेन्डा ‘भ्रष्टाचार शून्य बाँके–२’ लाई पुनः दोहोर्याउँदै पारदर्शी विकास र जवाफदेहितालाई प्राथमिकतामा राख्ने प्रतिबद्धता व्यक्त गर्नुभयो। “जनताको कर र विश्वास दुवैको रक्षा गर्नुपर्छ,” उहाँले बताउनुभयो।स्थानीय बासिन्दाले बिहानै उम्मेदवार दैलोमा पुगेकोप्रति सकारात्मक प्रतिक्रिया दिएका छन्। एक ज्येष्ठ नागरिकले भने, “मतदान गर्न सिकाउनु र समस्या सुन्नु दुवै काम सँगै गरेको देख्दा भरोसा बढेको छ।”
आज बुधबार बिहानको यो घरदैलो अभियानले नेपालगन्ज–१४ मा चुनावी माहोल थप तातिएको छ। प्रत्यक्ष संवाद र सचेतना अभियानसँगै बिष्टको सक्रियता मतदाताको ध्यान तानिरहेको देखिन्छ।
